1Th 3 | ZomZIV | STEP | Tua ciangin ka thuak zawh nawn het loh uh ciangin Athen ah ko kia hong kinusiat ding a hoih pen dingin ka ngaihsun uh hi.

c1Th 1:23

1 Thessalonians 3

1 Tua ciangin ka thuak zawh nawn het loh uh ciangin Athen ah ko kia hong kinusiat ding a hoih pen dingin ka ngaihsun uh hi. 2 Na upna uh hong thakhauhsak ding le hong hanthawn dingin Christ lungdamna-thu zelhsakna ah Pasian na i seppih, i sanggampa ^{▼▼3.2 Khutgelh pawlkhatah sanggampa le ka naseppih uh; adang khutgelhte ah ka sanggampa uh le Pasian’ nasem} Timothy kong sawl uh hi. 3 Tua in hih zia-etnate hanga kuamah a linglawn loh ding deihna ahi hi. Kote zia-etna thuak dinga laitansa ka hilam uh na theih luatsa uh ahi hi. 4 A taktakin no tawh i omkhawm lai-in kote hong kibawlsiat ding kong gengen zo uh hi. Na theih khitsa bangun a piang petmah hi. 5 Hih thu hangin ka thuak zawh nawn loh ciangin note upna thu kan dingin kong sawl hi. Mikhempa in bang lam hiam khatin hong khema, ka nasepna uh a mawkna a suah khak ding ka lauthawng hi. ^b

Thalawphuai Timothy Thuzaksakna

6 Ahi hangin tumah in no kiang pan Timothy hong tung khinphet hi-a note upna itna le lungdamna thuthak hong puak hi. Amah in ko kiangah a lungdamhuai nong phawk tawntungna uh le kote no tawh i kimuh ding ka ut bang tektek un kote nong muhnopnate uh hong gen hi. 7 Tua ahi manin sanggamte aw, kote ka lungdonna uh le hong kibawlsiatna khempeuh ah note upna thu in hong hanthawn hi. 8 Ahang in, tu-in Topa sungah kiptaka na din khit manun ka nungta takpi ta uh hi. 9 Pasian mai-ah note hanga ka lungnopna khempeuh uh thuk kik nadingin Pasian tungah bangci in a kicing lungdamna a kimin ko kik thei ding ka hi uh hiam? 10 Note tawh kimu kika na upna uh a kisam laite kong huh theih nadingun sun le zanin hahkat theih tawpin hahkatin thu ka ngen uh hi. ^c

11 Tu-in Pasian le Pa mahmah le i Topa Jesu in no kianga kong hawh theih nading uh lampi hong honsak ta hen. 12 No kong itna uh a khan semsem bangin note khat-le-khat le midang khatpeuh na itna uh Pasian in khangsak in dimletsak ta hen. 13 I Topa Jesu a misiangthote khempeuh tawh hong pai ciangin eite Pasian le Pa mai-ah siangtho-a kawkbaanna a om loh nadingin amah in na lungtang uh hong thakhauhsak ta hen. ^d